Novas

mércores 10/02/2010

O venres comezan na praza da Capela os actos do Entroido 2010 de Carral

As festas do Entroido 2010 de Carral comezan este venres coa sentada do Entroido e a lectura do testamento, vai ser ás 21:00 horas na praza da Capela. Xa ás 22:00 horas terá lugar un baile de disfraces no local social de San Vicente de Vigo, amenizado por un dúo musical. O sábado haberá baile de disfraces nos locais sociais de Cañás e Barcia con acompañamento dun dúo musical.

Os rapaces
Para o domingo o Concello ten preparado un día moi especial para os mais cativos. Así, no Campo da Feira terá lugar unha festa infantil dende as 17:00 horas ata as 20:00 horas. Os rapaces terán á súa disposición monitores especializados que lles prepararán todo tipo de entretementos coma: xogos, maquillaxes, globoflexia, entre outras propostas.

Ademais haberá unha merenda con filloas e orellas e un concurso de disfraces infantil con agasallos para todos e premios ao disfraz mais simpático, ao máis bonito, ao máis feo e ao máis orixinal. Tamén haberá baile de disfraces no local social de Sergude, amenizado por un dúo musical. Xa para o luns está previsto que haxa bailes de disfraces amenizados por dúos musicais nos locais sociais de Quembre e Tabeaio.

Martes de Entroido
O día grande do Entroido 2010 será o martes, os actos comezarán ás 17:00 horas coa presentación do concurso de disfraces no Campo da Feira. Xa ás 17:30 horas terá lugar o tradicional desfile de carrozas e comparsas polas rúas de Carral coa charanga Ruada.

Tralo desfile, ás 19:30 haberá baile do entroido na carpa do Campo de Feira amenizado por un grupo musical e con degustación de lacón e orella. Tamén será este o momento no que se coñecerá aos premiados no concurso de disfraces de adultos. As festas rematarán co enterro do Entroido ás 23:00 horas.

Axudas ás comparsas
Para animar a todos os carraleses a participar nestas festas, o Concello repartirá axudas de 120 euros para carrozas e comparsas do municipio que se inscriban antes do 8 de febreiro na Casa da Cultura e que teñan entre os seus compoñentes a 10 empadroados no municipio.

Os premios de este ano para os gañadores do concurso de disfraces na modalidade de carrozas serán de 400 euros para o primeiro, 300 euros para o segundo e 200 euros para o terceiro. Pola súa banda as comparsas gañadoras recibirán 300 euros a primeira, 200 euros a segunda e 120 euros a que quede en terceiro lugar. Os actos do Entroido 2010 de Carral están organizados polo concello de Carral.